د فنلنډ او روسیې تر منځ د لارو له تړل کېدو وروسته لسګونه کډوال پولې ته څېرمه بند پاتې دي
د فنلنډ له پرېکړې وروسته چې له روسیې سره یې خپلې څو لارې تړلې، لسګونه کډوال د دواړو هېوادونو د سرحدي خنډونو تر شا بند پاتې دي. فنلنډ پر روسیې تور لګوي چې له امریکا سره د دغه هېواد د دفاعي همکارۍ د زیاتېدو په غچ کې خپلو پولو ته د کډوالو لارښوونه کوي.
د فنلنډ پوله ساتو د تیرې جمعې په شپه په سوېل ختیځ فنلنډ کې د والیما، نوئیاما، اېماټرا او نیرالا په لارو کې خنډونه جوړ کړل، چې د کډوالو ډیر تګ راتګ لري.
له دې ګام وروسته، د صفر درجې تودوخې په منځ کې، لسګونه کډوال د والیما او نوئیاما ته رسیدلي او د دې دوو لارو د بیا پرانېستلو په تمه دي.
فنلنډ له روسیې سره شاوخوا ۱۳۴۰ کیلومټره ګډه پوله لري، چې اروپا ته د کډوالو د تګ یوه له مهمو لارو څخه بلل کېږي.
د فنلنډ سرحدي ساتونکي وايي، تېره اوونۍ شاوخوا ۳۰۰ کډوال چې ډېری یې له عراق، یمن، سومالیا او سوریې وو، دغه هېواد ته رسېدلي دي.
د فنلنډ چارواکو زیاته کړې چې د دغه هېواد په شمال کې د سالا او وارټیوس لارې اوس مهال د پناه غوښتونکو پر مخ خلاص دي.
روسیې د فنلنډ له خوا د پولو د تړلو په غبرګون کې ویلي چې هلسینکي "لویه تېروتنه" کړې چې دوه اړخیزې اړیکې له منځه وړي.
