اسراییل د غزې په سوېل کې د خان یونس له څلور لکو اوسېدونکو وغوښتل چې له دغه ښاره ووځي
اسراييلي چارواکو د خان یونس له اوسیدونکو غوښتي، چې د غزې لوېديځ ته چې د دوی په وینا د جګړې له کرښې لرې او بشري مرستو د وېش مرکزونو ته نږدې پرته سیمه ده، کډه شي.
د اسراييل د لومړي وزیر مرستیال مارک رگیف، ویلي: «موږ له خلکو غواړو چې له دغه ځایه وکوچیږي. په دې پوهیږو چې ښايي دا کار د ډېرو له پاره اسانه نه وي، خو نه غواړو چې ولسي خلک د جګړې په منځ کې ایسار پاتې شي.»
اسرایيل تر دې وړاندې د غزې د شمالي برخې له اوسېدونکو هم غوښتي و، چې د غزې سوېل ته دې کډه شي. کله چې د دغه هېواد پوځیان غزې ته د ننه شول او وروسته یې په شمالي برخه کې د خپلې واکمنۍ خبر هم ورکړ.
خو اوس اسراييلي پوځ د غزې له سوېلي سیمې له اوسیدونکو چې ډېر یې له شمالي برخو بې ځایه شوي غوښتي چې د غزې لویدیځ ته دې وکوچیږي. دا هغه څه دي چې دغه بیځایه شوي خلک به یو ځلې بیا بیځایه کېدو ته اړ باسي.
د ملګرو ملتونو د بشري حقونو ادارو په غزه کې پر دغې جبري کوچېدنې نیوکه کړې.
د اسراییل د لومړي وزیر مرستیال وايي چې اسراييلي ځواکونه له تونلو او د ځمکې لاندې تونلونو څخه د حماس وسله وال له سیمې وباسي او د ښار مرکزي برخو ته پرمختګ وکړي.
هغه زیاته کړه له هغه ځایه چې لوېدیځې سیمې د رفح بندر سره مصر ته نږدې پرتې دي بشري مرستې ورته «ډېر ژر» رسېدلای شي.
