د فلسطین روغتیا وزارت:په غزې تړانګه کې د انټرنیټ بندېدو له امله د زیانونو شمېر نه معلومیږي
د حماس تر کنټرول لاندې د فلسطین روغتیا وزارت ویاند د شفاء روغتون حالت له ناورین څخه لا بد بللی او ویلي یې دي چې پر دغه روغتون د اسراییل له خوا له هر لوري برید شوی دی. اشرف القدره ویلي چې، د انټرنیټ او مخابراتي شبکو د بندیدو له امله په غزه کې زیانونه نه شمیرل کیږي.
د اناتولي خبري اژانس د شنبې په ورځ (د لړم ۲۰مه) د فلسطین روغتیا وزارت د ویاند له قوله راپور ورکړ چې، «د شفاء روغتون انګړ د اسراییل د بې پیلوټه الوتکو له پاره په یوه خلاص میدان بدل شوی چې هر هغه کس چې خوځیږي په نښه کیږي.»
القدره د بې ځايه شويو کورنيو، روغتیایي کارکوونکو او په دغه روغتون کې د ټپيانو په ګډون د څه باندې شل زره کسانو شتون ته په اشارې سره وويل چې، مړي او ټپيان د یاد روغتون په دروازه او په ځمکه پراته دي.
د اسراییل پوځ اعلان کړی چې د دغه هېواد پوځیان د غزې په شفاء روغتون ډزې نه کوي او د دغه روغتون په شاوخوا کې د حماس له وسله والو سره نښتې دوام لري.
د فلسطین روغتیا وزارت ویاند د اکسیجن او مرستندویه وسایلو د نشتوالي له امله د یوه نوي زیږیدلي ماشوم د مړینې خبر هم ورکړ او د روغتیایي وسایلو په بیړنۍ اړتیا یې ټینګار وکړ.
تر دې مخکې د فلسطین د روغتیا وزیر ویلي وو چې ۳۹ نوي زیږیدلي ماشومان د اکسیجن د کمښت له امله په شفاء روغتون کې له ګواښوونکي وضعیت سره مخ دي.
نوموړي وویل چې، په غزه کې له ۳۵ روغتونونو څخه څه باندې ۲۰ روغتونونه د اسراییل د بریدونو او د تیلو د کمښت له امله له کاره لوېدلي دي.
د وال سټریټ ژورنال د راپور له مخې، شفاء روغتون د اسراییل تر محاصرې لاندې دی او تر درې زره کم کسان په کې پاتې دي.
په راپور کې همداراز زیاته شوې چې، د اسراييلي چارواکو په خبره ښايي تر روغتون لاندې يو شمېر يرغمل شوي کسان ساتل شوي وي او دې موضوع د پوځ کار ستونزمن کړی دی.
د اسراییل حکومتي ویاند ویلي چې د حماس مرکزي دفتر د شفاء روغتون لاندې موقعیت لري.
د غزې روغتیا وزارت د شمېرو له مخې، په غزې تړانګه کې د اسراییلپه بریدونو کې تر اوسه بورېڅه باندې ۱۱ زره کسان وژل شوي او تر ۲۷ زرو زیات ټپیان شوي دي.
