د پاکستان حکومت: ناقانونه کډوال دې له دغه هېواده ووځي، که نه په زوره به واېستل شي
د پاکستان د کورنیو چارو وزیر سرفراز بګټي یو ځلې بیا د افغانانو په ګډون ټولو ناقانونه کډوالو ته ګوت څنډنه کړې، چې دوی د ناقانونه کډوالو د اوسېدو زغم نه لري او له زوره کار اخیستلو ته هم اړ وتي دي.
هغه په خپلې تازه څرګندونو کې ویلي، چې دا یې بې اسناده کډوالو ته وروستۍ وینا او خبرداری دی.
د پاکستاني وزیر په وینا، دوی د نومبر میاشتې تر پیله ټولو ناقانونه کډوالو ته له پاکستانه د وتو وخت ورکړی او که څوک په رضا له پاکستانه نه وځي، په زوره به یې وباسي.
پاکستاني چارواکي وايي، په دغه هېواد کې د ناقانونه افغان کډوالو شمېر تر ۱،۷ مېلیونه تنو ته رسېږي.
له هغه مهاله چې کډوالو ته نوی ضرب الاجل وټاکل شو، په تېرو څو اوونیو کې د شاوخوا یوسلو پنځوس زرو تنو د په زوره ویستل کېدو خبرونه هم خپاره شوي دي.
په افغانستان کې بیا واکمنو طالبانو په زوره د افغان کډوالو د اېستلو لپاره یو لړ ګامونه اخیستي او په ځینو سرحدي سیمو کې یې لنډمهاله پنډ غالي وار د مخه جوړ کړي دي.
دا رنګه طالبانو تېره ورځ د داسې یو کمیسیون د جوړېدو خبر هم ورکړ چې په وخت سره د کډوالو ستونزې هوارې کړي.
پر طالبانو یو شمېر نېوکه کوونکي وايي، له پاکستانه د افغان کډوالو په زوره ستنولو کې له پاکستان سره د طالبانو لاس دی، ځکه د دوی په باور، په دې برخه کې د طالبانو نرمښت دا ښيي چې ګواکې د پردې تر شا دواړه غاړې یو لړ جوجاړيو ته سره رسېدلي؛ خو دا هغه څه دي چې تر اوسه یې د خپلواکو سرچینو لهخوا پخلی نه دی شوی.
