کرېکټ نړیوال جام کې د هند او پاکستان د ملي لوبډلو سیالي روانه ده

په هند کې د ۲۰۲۳ کال کرېکټ نړیوال جام سیالیو کې د شنبې په ورځ د کوربه هېواد او پاکستان سیالي پیل شوه. پاکستان او هند تر دې مخکې په دغه جام کې دوه- دوه سیالۍ کړې او دواړو دا لوبې ګټلې دي. د هند او پاکستان نننۍ لوبه د ګجرات ایالت په احمد اباد ښار کې روانه ده.

د رویټرز د راپور له مخې دې لوبې ته تر یو لک کسان د نندارې لپاره ورغلي دي.

د کرېکټ نړیوالې شورا نړیوال جام د اکتوبر پر پنځمه په هند کې پیل شو او د نومبر تر ۱۹ به روان وي.

په سږني جام کې د افغانستان، اسټرالیا، بنګله دېش، انګلنډ، هند، هالنډ، نوی زیلنډ، پاکستان، سوېلي افریقا او سریلانکا ملي لوبډلې ګډون لری.