د ښځو د حقونو یوې ډلې په افغانستان کې د "جنسي توپیر" د رسمیت پېژندلو لپاره خپل پرلت بیا پیل کړ.
تمنا زریاب پریاني د جرمني په ویپرفورټ ښار کې د اعتراضي خیمې په درولو سره په اروپا کې له افغان فعالانو وغوښتل، چې له دغه کمپاین سره یوځای شي.
د آغلې پریاني په اېکس پاڼه کې د خپرې شوې غوښتنې په متن کې راغلي:« موږ په جرمني کې د ښځو او ټولو ازادو خلکو وجدان ته په اشارې سره له هغوی څخه غواړو، چې په افغانستان کې د خپلو خویندو تر څنګ ودرېږي او د جنسیتي توپیر اجازه ورنکړي.»
د ښځو د حقونو دغو فعالانو د وږي له لسمې تر دوه ویشتمې د جرمني په کُلن ښار کې د اعتراض خیمې په درولو سره د نه خوړو اعتصاب کړی و.
دوی د جرمني، امریکا او ملګرو ملتونو د حکومتونو له استازیو سره هم خبرې کړې دي، چې تر اوسه د دوی د قناعت وړ نه دي.
تر دې مخکې مېرمن پریاني د یوې خبرپاڼې په خپرولو سره ویلي و، چې هغې د جرمني د بهرنیو چارو وزارت له استازي سره د کتنې پر مهال د افغان مېرمنو پیغام په ښکاره توګه د جرمني د بهرنیو چارو وزارت ته رسولی؛ خو روښانه ځواب یې نه دی ترلاسه کړی.