یوه پاکستانۍ مېرمن یوشمېر افغان کډوالو مېرمنو سره د کار د زمینې په برابرولو کې مرسته کوي
د پاکستان د پېښور ښار په یوه کوچني روزنیز مرکز کې ۱۲ افغان مېرمنې خیاطي زده کوي. ماهرې بشیر د حرفوي زدهکړو دغه مرکز هغه وخت جوړ کړ، چې پاکستان ته د افغانانو د پراخې کډوالۍ او له ګڼو اقتصادي ستونزو سره د هغوی د مخامخ کېدو شاهده وه.
دغې پاکستانۍ میرمنې د د غه مرکز په جوړولو سره هڅه کړې، چې په دې ښار کې له هغو افغانو کډوالو ښځو سره د مالي خپلواکۍ په ترلاسه کولو کې مرسته وکړي چې په افغانستان کې له کار کولو او زدهکړو بې برخې شوې دي.
رویټرز خبري اژانس لیکلي، چې ماهرې بشیر دغه مرکز ښځو ته د ګنډلو، ډیجیټل مهارتونو او د سینګار د زدهکړې لپاره جوړ کړی دی.
د اغلې بشیر د دې مرکز له جوړېدو وروسته په سلګونو مېرمنو په چټکۍ سره د هغې په کار ځای کې د ګډون لپاره نوم لیکنه وکړه.
مېرمن بشیر وایي:« که موږ مرستې ترلاسه کړو، زه فکر کوم چې موږ کولای شو په یوه وخت کې له ۲۵۰ څخه تر ۵۰۰ پورې زدهکوونکي وروزو.»
دغه پاکستانۍ ښځینه سوداګره په دې باور ده، چې که ښځې ځواکمنې شي دوی کولای شي په ټولنه کې مهم رول ولوبوي.
پاکستاني چارواکي وايي، چې په ۱۴۰۰ کال کې پر افغانستان د طالبانو له بیا واکمنېدو وروسته لسګونه زره افغانان پاکستان ته راغلي دي.
مخکې له دې چې طالبان واک ته ورسېږي، پاکستان د شاوخوا یو نیم میلیون راجستر شویو کډوالو کوربه و.
د ملګرو ملتونو د راپور له مخې، په پاکستان کې د افغان کډوالو شمېر په نړۍ کې یو له سترو کډوالو شمېر ګڼل کېږي.
رویټرز په خپل راپور کې لیکلي، اټکل کېږي چې په پاکستان کې تر یو میلیونه زیات کسان له ثبت پرته ژوند کوي.
چارواکي وايي، د پاکستان حکومت، چې په خپله له اقتصادي ناورین سره لاس او ګرېوان دی، هېواد ته د افغانانو د راتګ په اړه اندېښنه لري.
پاکستاني چارواکو تایید کړې، چې په وروستیو میاشتو کې لسګونه افغانان په دې هېواد کې د اوسېدو د قانوني اسنادو نه لرلو په تور نیول شوي دي.
اغلې بشير وويل، که څه هم د هغې دا روزنیز مرکز د افغان ښځو پر پياوړتيا تمرکز کوي؛ خو يو شمېر پاکستاني مېرمنې هم د پېښور په خورا محافظه کار ښار کې د پاکستاني مېرمنو لپاره د کار او زدهکړې فرصتونو د زياتولو په موخه د دې په کار ځای کې برخه اخلي.
په راپور کې راغلي، چې له درېیو میاشتو روزنې وروسته ښځې کولای شي خپل کاروبار پیل کړي او منځنی عاید ترلاسه کړي.
نولس کلنه افغانه نجلۍ چې په دغه مرکز کې روزل شوې وايي، له دغه مرکز څخه تر فراغت وروسته غواړي په پېښور کې د ښکلا یو سالون پرانیزي، هغه کار چې اوس په خپل هېواد کې چې یوازې څو کیلومتره لیرې دی، غیر قانوني دی.
فاطمې وویل، د هغې پلان دا دی چې لومړی په کور کې د ښکلا سالون پیل کړي او بیا مسلکي کار ته دوام ورکړي؛ تر څو په خپلواکه توګه د ښکلا لوی سالون پرانیستلی شي.
