د ۱۱ هېوادونو اعلامیه د افغان مېرمنو د «جنسيتي ځورونې» د ختمولو لپاره اغېزناک ګامونه غواړي
امریکا، بریتانیا، فرانسې، جاپان او ځینې نورو هېوادونو په یوه ګډه اعلامیه کې له افغان مېرمنو سره د طالبانو چلند «جنسیتي ځورونه» بللې ده. دغو هېوادونو «په افغانستان کې سیستماتیک تبعیض، د جنسیت تفکیک او پر ښځو او نجونو بندیز» غندلی دی.
د دغو هېوادونو په ګډه اعلامیه کې راغلي، چې «د بشري حقونو محدودیتونه او د ښځو پر ژوند یې اغېزې په ټوله نړۍ کې بې ساري او دجنسیتي ځورونې تر حده دي.»
امريکا، بريتانيا، فرانسې، جاپان، برازيل، سويس، متحده عربي اماراتو، البانيا، اکوادور، ګابن او مالټا دغه اعلاميه په داسې حال کې لاسليک کړې، چې د افغانستان په اړه د امنيت شورا غونډه روانه وه.
په نننۍ غونډه کې د دغې شورا دایمي او نا دایمي غړو د افغان ښځو او نجونو په اړه د طالبانو پر سیاستونو نیوکې وکړې.
د ۱۱ هېوادونو په اعلامیه کې له طالبانو غوښتل شوي، چې ټولې هغه تګلارې او اقدامات لغوه کړي چې د ښځو زدکړه، کار او د بیان ازادي محدودوي.
څرنګه چې افغانستان د ښځو په وړاندې د هر ډول تبعیض د له منځه وړلو د کنوانسیون غړی دی، نو دغو هېوادونو د دغه کنوانسیون د احکامو او د هغې د تطبیق په برخه کې د افغانستان د ژمنتیا غوښتنه کړې ده.
