د هانګژو اسيايي لوبې؛ د افغانستان د امید کرېکټ ملي لوبډله د اسیا په سیالیو کې ګډون کوي

د افغانستان کرېکټ بورډ افغانستان انټرنشنل ته وویل، چې د افغانستان امید کرېکټ ملي لوبډله به د هانګژو په اسیایي سیالیو کې ګډون وکړي. تر دې مخکې ویل شوي وو، چې دغې لوبډلې د هانګژو اسیايي سیالیو کې د ګډون لپاره منصرفه شوې وه.

د افغانستان د کرېکټ بورډ ویاند سید نسیم سادات افغانستان انټرنشنل ته وویل، چې د افغانستان د کرېکټ د ۲۳ کلنو ملي لوبډله د هند، پاکستان، سریلانکا او بنګله دېش ټیمونو په څېر د اسیا د کرېکټ د سیالیو په اتم پړاو کې ده.

هغه وايي، چې په دغو سياليو کې د اسيايي هېوادونو له ١٤ لوبډلو څخه پاتې ٩ لوبډلې به له يو بل سره سيالي وکړي، تر هغې چې درې مخکښې لوبډلې نیمه پایلوبې پړاو ته لار ومومي.