د امر بالمعروف او نهي عن المنکر وزارت سرپرست شیخ محمدخالد حنفي د خپلو ولایتي سفرونو په لړ کې غور ولایت ته تللی.
د طالبانو تر کنټرول لاندې ملي ټلویزیون په اېکس شبکه کې لیکلي، چې ښاغلي حنفي په دغه سفر کې د ښځو د حقونو پر ورکړه ټینګار کړی دی.
نوموړی په غور ولایت کې یوې غونډې ته د وینا پر مهال ویلي، چې طالبان د ښځو د حقونو ورکړې په برخه کې د ملت غوښتنو ته ژمن دي.
حنفي همداراز زیاتوي، د ښځو د حقونو د ملاتړ په نوم ځینې کسان هڅه کوي، چې څو ښځې بې حجابۍ ته وهڅوي.
د طالبانو له واکمنۍ وروسته د طالبانو امر بالمعروف او نهي عن المنکر وزارت پر ښځو د بندیزونو لسګونه فرمانونه صادر کړي او وروستی اقدام یې بند امیر ملي پارک ته د ښځو په ورتګ د بندیز لګول و.
محمد خالد حنفي د شنبې په ورځ په خپله وینا کې بند امیر ملي پارک ته د ښځو په ورتګ بندیز په شفاهي ډول اعلان کړ.
نوموړي د دغه بنديز لامل د ښځو " بې حجابي" په ګوته کړه.