د جرمني په مونیخ ښار کې د یوه افغان کډوال له خوا پر یوې پولنډۍ نجلۍ له جنسي تېري وروسته د پولنډ لومړي وزیر ویلي، چې دا پېښه د پرانیستو پولو د سیاستونو پایله ده.
ماتیوس موراویسکي د جنسي تېري د دغې قضیې په څېړنه کې د پولنډي څارنوالانو د ګډون غوښتنه کړې ده.
نوموړي زیاته کړې: "موږ په سیمه کې یو له خورا خوندي هېوادونو څخه یو، زموږ لپاره امنیت اهمیت لري، زه له المان څخه غواړم چې د پولنډیانو قضیو ته دې رسیده ګي وکړي”.
بلخوا المانۍ ورځپاڼې بيلډ راپور ورکړى، چې پر دغه ښځينه زده کوونکې د تېرې شنبې په ورځ(د زمري ۲۸مه) د مونيخ په فرعي تمځای کې جنسي تېری شوی دی.
د دغه راپور له مخې؛ پوليس توانېدلي، چې د مونیخ په رامیرسدورف کې د کډوالو په یوه کمپ کې شکمن کس ونیسي.
له دې پېښې وروسته د پولنډ د بهرنیو چارو وزارت یو جرمني ډېپلومات ور غوښتی، چې د یادې پېښې په اړه وضاحت ورکړي.
اوسمهال په پولنډ کې پارلماني ټاکنې نېږدې دي، د کډوالۍ مساله یوه له ټاکنیزو مسالو څخه ده، چې ډېر پام ورته کیږي.
دا لومړۍ پېښه نه ده، بلکې تېر کال هم په فرانسه کې د یوه افغان له خوا پر یوې فرانسوي نجلۍ د جنسي تېري پېښه ثبت شوې وه.