علي اکبر امیري د سویلي کوریا د جي۲ نړیوالو ازادو سیالیو د سرو زرو مډال خپل کړ
د هېواد د ټېکواندو ملي لوبډلې غړي امیري د سویلي کوریا د جي۲ نړیوالو ازادو سیالیو د سرو زرو لومړنی تاریخي مډال ګټلی. امین امیني ددغو سیالیو یو بل ګډونوال دی، چې په پرله پسې توګه يې خپلو جاپاني سیالانو ته ماتې ورکړه او منځلوبو ته یې لار ومینده.
د ټېکواندو دغه سیالۍ د سویلي کوریا په چون چان ښار کې روانې دي او د ۶۰ هېوادونو ۵۲۳ ټېکواندوکارانو په کې برخه اخیستې ده.
بل خوا د المپيک ملي کمېټې بدني روزنې او سپورټ عمومي ریاست چارواکي وایي، چې د افغانستان د بېلابېلو ورزشي څانګو لوبغاړو په تېر يوه کال کې ۴۹ بهرنیو سياليو کې ګډون کړی چې په پايله کې يې افغان لوبغاړو ۲ د سرو زرو، ۱۰ د سپينو زرو او ۱۰ د برونزو مډالونه ګټلي دي.
