د انډونیزیا ولسمشر او او ای سي سرمنشي:په افغانستان کې باید د نجونو تعلیم ته اجازه ورکړل شي
د انډونیزیا د بهرنیو چارو وزیره وايي؛ د دغه هېواد ولسمشر جوکو ویدودو او د اسلامي همکاریو د سازمان سرمنشي حسین ابراهیم طه په جاکارتا کې لیدلي او د نورو مسایلو تر څنګ یې په افغانستان کې د نجونو د ښوونځیو د پرانیستل کېدو په خبره ټینګار کړی دی.
د انډونیزیا د بهرنیو چارو وزیري رنتو مرسودي پر ټویټر (ایکس) لیکلي، چې ولسمشر ویدودو او ابراهیم طه په افغانستان کې د افغان مېرمنو او نجونو د کار او زده کړو پر حقونو خبرې کړي او ټینګار یې کړی چې جونو ښوونځي باید پرانیستل شي.
نوموړې زیاتوي چې دواړو مشرانو په افغانستان کې د روان بشري وضعیت، د بشري مرستو پر رسولو او څرنګوالي هم خبرې کړي دي.
د انډونیزیا ولسمشر او د اسلامي همکاریو د سازمان سرمنشي دا خبرې په داسې مهال کوي، چې طالبانو په وار – وار ویلي؛ د ښځو د زده کړو او کار مساله د افغانستان داخلي مساله ده او نړۍوال پکې د مداخلې حق نه لري.
د یادونې وړ ده، چې واک ته د طالبانو له رسېدو وروسته په افغانستان کې د نجونو له شپږم ټولګي پورته زده کړې ځنډولي او په رسمي دفاترو کې د ښځو پر کار بندیز لګېدلی دی.
