د اېلان ماسک او مارک زوکربرګ مسابقه به پر ټویټر په ژوندۍ بڼه خپره شي
د ټویټر(X) شبکې مالک اېلان ماسک نن یکشنبه پر خپلې ټویټر پاڼې لیکلي؛ چې د فیسبوک له مشر مارک زوکربرګ سره کېدونکې د رزمي لوبو مسابقه به یې پر ټویټر په ژوندۍ بڼه خپره شي.
که څه هم د دغې مسابقې نېټه نه ده ټاکل شوې خو که چېرې دا دواړه میلیاردران سره مخامخ کېږي نو د ماسک په خبره چې ګټه به یې د پخوانیو سرتېرو خیریه بنسټونو ته ورکوي.
د روان کال په چنګاښ میاشت کې اېلان ماسک د فیسبوک مالک مارک زوکربرګ ننګولی و چې له ده سره رزمي مسابقه وکړي او مارک هم منلې وه.
ماسک مني چې د رزمي لوبو کوم ځانګړی تمرین نه لري؛ مګر زوکربرګ د روان کال په غبرګولي کې د جوجیټسو یوه مسابقه لرله چې خپل حریف یې مات کړی و.
اېلان ماسک د هغې پوښتنې په ځواب کې چې د ایکس شبکې کاروونکي د دغې مسابقې د موخې په اړه کړې وه، لیکلي:«دا د جګړې متمدن شکل دی او نارینه جنګ خوښوي».
