وزارت معارف طالبان اعلام کرد که ۸ هزار و ۱۶۵ بست خالی معلمی و اداری را به رقابت گذاشته است.
برخی از معلمان مکاتب می‌گویند طالبان معلمانی را که آزمون دینی را موفقانه نگذارانند، برکنار می‌کند.
عبدالخالق صادق، معین تضمین کیفیت وزارت معارف طالبان یکشنبه ۲۵ سنبله در یک نشست خبری در کابل از اداره امتحانات این گروه خواست که مراحل استخدام بیش از ۸ هزار معلم و کارمندان این وزارت را تسهیل کند.
وزارت معارف طالبان در اعلامیه‌ای گفت که روند آزمون جذب معلمان و کارکنان این وزارت در دو مرحله برگزار می‌شود. این وزارت می‌گوید که آزمون استخدام معلمان مکاتب دولتی در ۲۳ ولایت در مرحله نخست و ۱۱ ولایت در مرحله دوم برگزار می‌شود.
با این حال، برخی از معلمان مکاتب می‌گویند که نماینده‌های امر به معروف طالبان در مکاتب به معلمان علوم دینی آموزش می‌دهند و هر چند ماه در حوزه تعلیمی امتحان علوم دینی برگزار می‌کنند. به گفته این معلمان، کسانی که این آزمون را موفقانه نگذرانند، برکنار می‌شوند.
معلم یکی از مکاتب دولتی در ناحیه چهارم شهر کابل به افغانستان اینترنشنال گفت، در سه سالی که طالبان در افغانستان تسلط دارند، در حوزه چهارم تعلیمی هفت بار آزمون علوم دینی را گذرانده است.
این معلم می‌گوید که طالبان با به قدرت رسیدن در افغانستان، سیستم ارزیابی سالانه و بست و قدم معلمان را از بین برده و به جای آن برای معلمان آموزش و امتحان علوم دینی برگزار می‌کنند. او اضافه کرد که طالبان بدون درنظرداشت رشته، از معلمان علوم ساینس و اجتماعی امتحان علوم دینی می‌گیرند.
به گفته این معلم مکتب دولتی، طالبان در سه سال گذشته دهها معلم را در سراسر افغانستان به دلیل عدم تسلط به علوم دینی برکنار کرده و به جای آن‌ها فارغان مدارس دینی را استخدام کرده‌اند.
معلمی مکتبی از کابل گفت نماینده امر به معروف طالبان به آن‌های کتاب‌هایی دینی زیر نام‌های سیرت‌النبی، دعوت‌الارشاد، فقه میسر و تعلیم‌الاسلام را تدریس و سپس امتحان می‌گیرند.