به گزارش رسانه‌های دولتی روسیه، رهبران سازمان همکاری شانگهای از ایده ایجاد «کمربند امنیتی» در اطراف افغانستان حمایت کردند.

پیشنهاد ایجاد کمربند امنیتی در اطراف افغانستان توسط تاجیکستان ارائه شده است.

ریانووستی، خبرگزاری دولتی روسیه روز پنجشنبه (۱۴ سرطان) گزارش داد که در بیانیه سران کشورهای سازمان همکاری شانگهای که به تصویب رسیده، به پیشنهاد تاجیکستان درباره ایجاد کمربند امنیتی در اطراف افغانستان اشاره شده است.

امامعلی رحمان، رئیس‌جمهور تاجیکستان طرح ایجاد کمربند امنیتی در اطراف افغانستان را در سال ۱۴۰۱ در نشست سازمان پیمان امنیتی جمعی مطرح کرد.

او در آن زمان تاکید کرد که به منظور پیشگیری از خطرات، ایجاد یک کمربند امنیتی در اطراف افغانستان ضروری است.

تاجیکستان از اعضای اصلی سازمان همکاری شانگهای و سازمان پیمان امنیت جمعی است.

در نشست دو روزه سران کشورهای سازمان همکاری شانگهای که از روز چهارشنبه ۱۳ سرطان آغاز شده، درباره افغانستان هم گفت‌وگو شد.

در بیانیه مشترک رهبران کشورهای عضو سازمان همکاری شانگهای هم بر ضرورت تشکیل یک دولت فراگیر در افغانستان تاکید شد. آن‌ها تشکیل دولتی فراگیر با مشارکت گسترده نمایندگان همه گروه‌های قومی و سیاسی را تنها راه دستیابی به صلح پایدار در افغانستان خواندند.

سران و نمایندگان کشورهای روسیه، قزاقستان، هند، ایران، چین، قرغیزستان، پاکستان، تاجیکستان، اوزبیکستان، بلاروس، مغولستان، آذربایجان، قطر، امارات متحده عربی، ترکیه و ترکمنستان در این نشست حضور داشتند.

هرچند بعضی از این کشورها با طالبان روابط اقتصادی و دیپلوماتیک دارند، اما هیچ یک طالبان را به رسمیت نمی‌شناسد.

طالبان در نشست سران سازمان همکاری شانگهای دعوت نشده است.

پس از به قدرت رسیدن طالبان هم، هیچکس به نمایندگی از افغانستان در نشست‌های این سازمان همکاری شانگهای اجازه ورود نیافته است.