شرفالدین گدایف، رهبر جنبش اصلاح و توسعه تاجیکستان به دعوت نهادی به نام «مرکز گفتمان سحر» به کابل سفر کرده است. آقای گدایف هدف از این سفر را تقویت امنیت منطقهای، توسعه همکاریهای مدنی و مبارزه با تهدیدات افراطگرایی اعلام کرد.
جنبش اصلاح و توسعه تاجیکستان، اپوزسیون تبعیدی و سازمان ممنوعه در این کشور روز پنجشنبه، ۱۱ ثور اعلام کرد که شرفالدین گدایف، رهبر این جنبش برای ایجاد سازوکارهای مشترک برای تقویت ثبات، توسعه تعامل سازنده جامعه مدنی تاجیکستان و افغانستان به کابل سفر کرده است.
جنبش اصلاح و توسعه تاجیکستان در بیانیهای نوشت که این سفر در پی نگرانیهای عمیق این سازمان از «تهدیدات تروریستی داعش خراسان» انجام شده است. این جنبش فعالیت داعش را خطر جدی برای کشورهای آسیای میانه و جامعه بینالملل خوانده است.
مقامات طالبان تاکنون درباره سفر شرفالدین گدایف، رهبر جنبش اصلاح و توسعه تاجیکستان به کابل، رسما ابراز نظر نکرده اند. این سازمان مخالف حکومت تاجیکستان نیز تاکنون از دیدار شرفالدین با مقامات طالبان گزارش نداده است.
اپوزسیون تبعیدی تاجیکستان نوشت که بخش قابل توجهی از اعضای داعش در شبکههای اجتماعی مانند اکس و تلگرام تاجیکستانی هستند. این جنبش خاطرنشان کرد که پیوستن شهروندان تاجیکستان به گروه داعش نتیجه مستقیم سیاست سرکوبگرانه حکومت امامعلی رحمان است.
جنبش اصلاح و توسعه تاجیکستان گفت شرفالدین گدایف به دعوت فضلالرحمن اوریا، رئیس «مرکز گفتمان سحر» به کابل سفر کرده است.
رسانههای وابسته به گروه طالبان، اما نوشتند که شرفالدین گدایف در این سفر امامعلی رحمان، رئیسجمهور تاجیکستان را مسئول «تیرگی روابط» میان طالبان و دوشنبه دانسته است.
یک رسانه وابسته به طالبان به نقل از شرفالدین گدایف نوشت که برخورد نادرست با مهاجران افغان و عدم تعامل دولت این کشور با گروه طالبان خواست مردم تاجیکستان نبوده و سیاست شخصی امامعلی رحمان است.
سفر رهبر یک جریان سیاسی مخالف در حالی به کابل انجام شده است که تاجیکستان در میان کشورهای آسیای میانه در بیش از سه سال گذشته کمترین روابط را با طالبان داشته است. امامعلی رحمان پیش از این از نفوذ گروههای اسلامگرای افراطی از طریق مرزهای افغانستان به کشورش ابراز نگرانی کرده است.
