شماری از مهاجران افغان در تاجیکستان به افغانستان اینترنشنال گفتند که دولت این کشور روند اخراج مهاجران افغان را افزایش داده است. آنها می‌گویند که تاجیکستان مهاجران دارای مدارک قانونی و ثبت آژانس پناهندگان سازمان ملل را نیز اخراج می‌کند.
این مهاجران می‌گویند که دولت تاجیکستان در روزهای پسین شمار زیادی از افغان‌ها را «بدون دلیل مشخص» اخراج کرده است.
افغان‌های مقیم تاجیکستان می‌گویند که بسیاری از مهاجران به دلیل نگرانی از بازداشت و اخراج، از خانه‌های خود بیرون نمی‌روند. به گفته آنها، دولت تاجیکستان خلاف استراتیژی جمهوری اسلامی ایران و پاکستان، بدون اعلام و هشدار قبلی، روند بازداشت و اخراج مهاجران افغان را در سراسر این کشور راه انداخته است.
یک زن افغان که اخیرا بازداشت و از تاجیکستان اخراج شده، گفت که دولت تاجیکستان بدون هیچ دلیلی افغان‌ها را اخراج می‌کند. او افزود: «برادرم سه روز پیش با ۴۳ خانواده از پاکستان اخراج شد، در حالی که فرزندان و پدر و مادر بیمارم در تاجیکستان مانده‌اند.»
این مهاجر اخراج شده می‌گوید که تمامی وسایل خانه و زندگی شان در تاجیکستان مانده و نیروهای امنیتی این کشور به آنها فرصت نداده که دست‌کم وسایل خود را منتقل کنند. او می‌افزاید که کارت اقامت مهاجران در تاجیکستان را با هزینه سنگین به دست آورده بودند، اما پولیس به آن توجهی نکرده است.
یک مهاجر دیگر افغان در تاجیکستان گفت حدود شش ماه پیش به‌طور قانونی با خانواده خود وارد تاجیکستان شده و در حال حاضر از سوی آژانس پناهندگان سازمان ملل به عنوان پناهجو ثبت شده‌اند. او گفت با آنکه حضور خانواده‌اش در تاجیکستان قانونی است، اما در معرض بازداشت و اخراج قرار دارد.
آژانس پناهندگان سازمان ملل در نهم دلو اخراج اجباری پناهجویان افغان از تاجیکستان را غیرقانونی خوانده و خواستار توقف آن شد. این سازمان گفت که دست‌کم ۸۰ پناهجوی افغان که بیشتر آنها دارای اسناد اقامت معتبر بودند در دسامبر سال ۲۰۲۴ از تاجیکستان اخراج شدند.
این سازمان قبلا تأکید کرده بود که اخراج پناهجویانی که در معرض خطر شکنجه یا سایر موارد نقض جدی حقوق بشر در کشور مبدا قرار دارند، مغایر قوانین پناهندگی تاجیکستان است. براساس گزارش‌ها، تا پایان سال ۲۰۲۴ تقریباً ۹ هزار پناهجوی افغان در تاجیکستان حضور داشتند.
