نمایندگان کشورهای مستقل مشترک‌المنافع از انتخابات پارلمانی تاجیکستان نظارت می‌کنند
نمایندگان کشورهای مستقل مشترک‌المنافع بر انتخابات پارلمانی تاجیکستان نظارت می‌کنند. انتخابات پارلمانی تاجیکستان روز یکشنبه ۱۲ حوت برگزار می‌شود.
رسانه‌های تاجیکستان روز شنبه ۲۰ دلو گزارش دادند که هیئت کشورهای مستقل مشترک‌المنافع برای نظارت بر آماده‌سازی و برگزاری انتخابات پارلمانی وارد تاجیکستان شده است.
آذربایجان، ارمنستان، اوزبیکستان، بلاروس، تاجیکستان، روسیه، قرغیزستان، قزاقستان و مولداوی اعضای اتحادیه کشورهای مستقل مشترک‌المنافع‌اند.
نورلان سایتموف، معاون دبیرکل کشورهای مستقل مشترک‌المنافع روز شنبه ۲۰ دلو با بختیار خدایارزاده، رئیس کمیسیون مرکزی انتخابات و همه‌پرسی تاجیکستان دیدار و درباره انتخابات پارلمانی گفت‌وگو کرد.
نورلان سایتموف اعلام کرد که هیئت کشورهای مستقل مشترک‌المنافع ماموریت خود را بر اساس اصول بی‌طرفی سیاسی انجام می‌دهد.
او گفت در ماموریت هیئت کشورهای مستقل مشترک‌المنافع برای نظارت از انتخابات پارلمانی تاجیکستان، ۱۲۰ نفر شرکت خواهند داشت.
مجلس نمایندگان تاجیکستان متشکل از ۶۳ نماینده است.
انتخابات پارلمانی قبلی تاجیکستان ۱۱ حوت ۱۳۹۸ برگزار شد.
رستم امامعلی، رئیس فعلی مجلس نمایندگان تاجیکستان است. او که پسر بزرگ امامعلی رحمان، رئیس‌جمهور تاجیکستان است، ۲۹ حمل ۱۳۹۹ به این سمت رسید.
طبق قانون اساسی تاجیکستان، رئیس مجلس نمایندگان در سلسله مراتب قدرت، شخص دوم در حکومت محسوب می‌شود و در صورت درگذشت رئیس‌جمهور یا کنار رفتنش از قدرت، تا انتخابات جدید، زمام امور را در دست می‌گیرد.
