طالبان در تخار کارگاهی را علیه مکتب‌های فکری کمونیسم، سوسیالیسم و سکولاریسم برگزار کرد
وزارت اطلاعات و فرهنگ طالبان اعلام کرد که یک کارگاه آموزشی را علیه مکتب‌های فکری کمونیسم، سوسیالیسم، سکولاریسم و ناسیونالیسم در ولایت تخار برگزار کرده است. این وزارت نوشته که در این کارگاه بیش از صد نفر از باشندگان ولایت تخار اشتراک کرده‌اند.
وزارت اطلاعات و فرهنگ طالبان یکشنبه، ۲۱ دلو در گزارشی نوشت که آمریت جوانان ریاست فرهنگ این گروه در تخار کارگاه یک روزه «عملی و فرهنگی» را علیه این مکتب‌های فکری برگزار کرده است. این وزارت نوشته است که مکتب‌های فکری یاد شده «باطل» است.
وزارت فرهنگ طالبان تاکید کرده است که این کارگاه آموزشی برای جلوگیری از «پیامدهای منفی» پیروی از مکتب‌های فکری کمونسیم، سوسیالیسم، ناسیونالیسم و سکولاریسم برگزار شده است.
عین‌الدین مطمئن، آمر جوانان ریاست اطلاعات و فرهنگ طالبان در تخار می‌گوید که پیش از این نیز کارگاه‌هایی را با همکاری سازمان الاعتصام برای جلوگیری از «تهاجم فکری و عقیدتی دشمنان دین» در این ولایت برگزار کرده‌اند.
وزارت فرهنگ طالبان در حالی از برگزاری این گونه کارگاه‌ها خبر داده است که گفته می‌شود این گروه هیچ مکتب فکری را جز قرائت ویژه خود از شریعت اسلامی، قبول ندارد.
