معاون سیاسی رئیس‌الوزرای طالبان می‌گوید روابط سیاسی این گروه با تاجیکستان در حال گسترش است
عبدالکبیر، معاون سیاسی رئیس‌الوزرای طالبان می‌گوید که روابط سیاسی این گروه با تاجیکستان نسبت به گذشته در حال پیشرفت است. عبدالکبیر گفت که با آنکه تاجیکستان هنوز سفارت افغانستان را به طالبان واگذار نکرده، اما روابط تجاری گسترده‌ای میان دو کشور جریان دارد.
معاون سیاسی رئیس‌الوزرای طالبان جمعه، ۱۴ جدی گفت که سفارت افغانستان در دوشنبه تاکنون تحت مدیریت این گروه نیست، اما گذرگاه شیرخان بندر به روی تاجران دو کشور باز است.
عبدالکبیر می‌گوید که تاجران افغان و تاجیکستان در حال حاضر میان دو کشور رفت و آمد می‌کنند. او در سخنرانی خود در کابل مدعی شد که روابط سیاسی و اقتصادی طالبان با کشورهای منطقه در حال گسترش و پیشرفت بوده است.
این مقام طالبان همچنان از کشورهای میزبان مهاجران افغان خواست که از اخراج اجباری افغان‌ها دست بکشند و اجازه دهند افغان‌ها داوطلبانه به کشور شان برگردند.
در بیش از سه سال گذشته، تاجیکستان نسبت به دیگر کشورهای آسیای میانه کمترین روابط را با طالبان داشته است.
تاجیکستان تاکنون حاضر نشده است نماینده دیپلوماتیک طالبان را در سفارت افغانستان بپذیرد. از سویی هم برخی از جریان‌های مخالف طالبان در این مدت در تاجیکستان فعالیت داشته‌اند.
