همزمان با افزایش تنش‌ها با طالبان؛ رئیس آی‌اس‌آی با رئیس‌جمهور تاجیکستان دیدار کرد
امام‌علی رحمان، رئیس‌جمهور تاجیکستان با جنرال عاصم ملک، رئیس سازمان اطلاعات ارتش پاکستان (آی‌اس‌آی) در شهر دوشنبه دیدار کرد. دفتر ریاست‌جمهوری تاجیکستان روز دوشنبه در اعلامیه‌ای گفت آنها درباره «تامین صلح، ثبات و امنیت منطقه‌ای» گفت‌وگو کردند.
بر اساس خبرنامه، امام علی رحمان از روابط دو کشور ابراز رضایت کرده و تاکید کرد که در کنار همکاری‌های امنیتی، تماس‌های مستمر مقام‌های دو کشور به سود تاجیکستان و پاکستان است.
آنها بر همکاری بیشتر در مبارزه با تروریسم، افراط‌گرایی و قاچاق مواد مخدر تاکید کردند.
این دیدار در زمانی برگزار می‌شود که تنش‌ها میان پاکستان و طالبان در افغانستان در حال افزایش است. در روزهای اخیر، در مرزهای دو کشور درگیری‌های مسلحانه رخ داده و تلفات در هر دو طرف گزارش شده است.
تاجیکستان، میزبان سران جبهه مقاومت ملی افغانستان است و از معدود کشورهایی در منطقه است که با طالبان روابط رسمی دیپلوماتیک ندارد.
تاجیکستان در سه سال و اندی حاکمیت طالبان، بارها از حضور گروه‌های تروریستی در افغانستان ابراز نگرانی کرده است. این کشور از حامیان اصلی جبهه مقاومت ملی برضد طالبان است.
هنوز مشخص نیست که رئیس آی‌اس‌آی با سران جبهه مقاومت ملی دیدار کرده است و یا خیر. پیشتر برخی دیپلومات‌های پاکستانی هشدار داده بودند که اگر طالبان جلو حملات تی‌تی‌پی را نگیرد، این کشور می‌تواند با جبهه مخالف این گروه رابطه برقرار کند.
جنرال عاصم ملک به تازگی به حیث رئیس آی‌اس‌آی گماشته شده است.
