اوزبیکستان به معاون طالبان قول سرمایه‌گذاری بیشتر در افغانستان را داد
عبدالسلام حنفی، معاون اداری رئیس‌الوزرای طالبان، روز دوشنبه با آیبیک عارف عثمانوف، سفیر اوزبیکستان در کابل دیدار کرد. عثمانوف گفت سرمایه‌گذاران کشورش آماده‌اند در تاسیس مراکز صحی، کارخانه سمنت و تجارت ذغال‌سنگ در افغانستان سرمایه‌گذاری کنند.
ارگ طالبان روز دوشنبه در خبرنامه‌ای نوشت که حنفی در این دیدار بر توسعه و گسترش روابط میان دو کشور تاکید کرده و اظهار داشت که طالبان تمام تسهیلات لازم را برای تاجران و سرمایه‌گذاران فراهم خواهد کرد.
سفیر اوزبیکستان نیز گفته است که «سرمایه‌گذاران این کشور آماده‌اند در زمینه‌های ایجاد مراکز صحی، واردات دارو، تاسیس کارخانه سمنت، و خرید و تجارت ذغال‌سنگ در افغانستان سرمایه‌گذاری کنند.»
گفتنی است که عبدالسلام حنفی اخیراً سفری به اوزبیکستان داشته است. با توجه به دیدارها و سفرهای معاون اداری طالبان، به نظر می‌رسد اداره این گروه مسئولیت پیشبرد روابط با اوزبیکستان را به عبدالسلام حنفی، اوزبیک‌تبار، واگذار کرده است.
اوزبیکستان از جمله کشورهایی است که روابط گسترده‌ای با طالبان دارد. هرچند این کشور تاکنون رژیم طالبان را به رسمیت نشناخته، اما اداره سفارت افغانستان در تاشکند را به این گروه واگذار کرده است.
