خواجه محمد آصف، وزیر دفاع پاکستان و یوسف شریف‌زاده، سفیر تاجیکستان در اسلام‌آباد درباره «وضعیت نظامی، سیاسی، اقتصادی و اجتماعی افغانستان» گفت‌وگو کردند. خواجه محمد آصف و یوسف شریف‌زاده گفتند وضعیت افغانستان مستقیما بر امنیت منطقه تاثیرگذار است.
جزئیات این گفت‌وگو اعلام نشده است.
اما خبرگزاری دولتی خاور تاجیکستان روز جمعه ۳۰ سنبله گزارش داد که در این دیدار طیف گسترده‌ای از موضوعات روابط تاجیکستان و پاکستان به ویژه در بخش امنیتی و نظامی مورد بحث و بررسی قرار گرفت.
طبق این گزارش، پاکستان از تلاش‌های تاجیکستان برای تقویت صلح و ثبات در آسیای میانه قدردانی کرده است.
تاجیکستان و پاکستان که مرز مشترک با افغانستان دارند در سه سال گذشته بارها از خطرات تروریستی از افغانستان ابراز نگرانی کرده‌اند.
مقام‌های پاکستان بارها گفته‌اند تی‌تی‌پی در افغانستان پناهگاه دارد و از خاک افغانستان حملات خود را در داخل پاکستان سازمان‌دهی می‌کند.
ممتاز زهرا بلوچ، سخنگوی وزارت خارجه پاکستان روز چهارشنبه ۷ سنبله در یک نشست خبری در اسلام‌آباد گفت گزارش‌های جهانی نشان می‌دهند که فعالیت‌های تحریک طالبان پاکستان و سایر گروه‌های تروریستی در افغانستان ادامه دارد.
امامعلی رحمان، رئیس‌جمهور تاجیکستان هم هشدار داده بود که افغانستان، به ویژه ولایات شمالی به محل پرورش تروریسم بین‌المللی تبدیل شده است.