ماموریت سفیر اوزبیکستان در افغانستان پس از ۱۲ سال پایان یافت
اداره طالبان از پایان ماموریت یادگار خواجه شادمانوف، سفیر اوزبیکستان در کابل پس از ۱۲ سال خبر داد. طالبان اعلام کرد که آقای شادمانوف در دیدار با عبدالسلام حنفی، معاون اداره این گروه گفت تاشکند خواستار گسترش روابط اقتصادی و بازرگانی با طالبان است.
برپایه اطلاعات وبسایت سفارت اوزبیکستان در کابل، آقای شادمانوف در ماه جون سال ۲۰۱۲ به عنوان سفیر در افغانستان گماشته شد.
صفحه ارگ تحت کنترول طالبان، روز دوشنبه، ۲۶ سنبله، در بیانیه‌ای از دیدار «تودیعی» یادگار خواجه شادمانوف با عبدالسلام حنفی خبر داد.
معاون اداری رئیس‌الوزرای طالبان از تلاش‌های سفیر اوزبیکستان برای «تقویت و گسترش روابط» در عرصه‌های مختلف قدردانی کرده است.
برپایه بیانیه طالبان، آقای شادمانوف نیز گفته اوزبیکستان خواستار گسترش روابط اقتصادی و بازرگانی با طالبان است. او افزود که بازرگانان و سرمایه‌گذاران اوزبیکستانی در بخش‌های مختلف به‌ویژه استخراج معادن و انرژی در افغانستان آماده سرمایه‌گذاری هستند.
اوزبیکستان هرچند مثل همه کشورها حکومت طالبان را به رسمیت نمی‌شناسد اما روابط نزدیکی با این گروه ایجاد کرده است. مقام‌های طالبان و اوزبیکستان در مدت سه سال حکومت طالبان، بارها افغانستان و اوزبیکستان از هم‌دیگر پذیرایی کرده‌اند.
