سید مومن یتیموف، رئیس کمیته دولتی امنیت ملی تاجیکستان در سفر به کابل با مقام‌های استخبارات طالبان دیدار کرده است.

منابع دیپلوماتیک می‌گویند این مقام امنیتی تاجیکستان در ماه اگست گذشته به کابل سفر کرده و با مقام‌های طالبان درباره تقویت روابط تاجیکستان با طالبان مذاکره کرده است.

منابع دیپلماتیک به افغانستان اینترنشنال گفتند که مومن یتیموف بلندترین مقام استخباراتی تاجیکستان است که به دستور امامعلی رحمان، رئیس‌جمهور این کشور به کابل رفته است.

او پس از بازگشت به دوشنبه سفر خود را «پر محتوی» تعریف کرده است.

پس از تسلط دوباره طالبان بر افغانستان، شماری از نظامیان پیشین و مخالفان سیاسی طالبان به تاجیکستان پناه بردند. در حال حاضر شماری از رهبران جبهه مقاومت ملی افغانستان در تاجیکستان زندگی می‌کنند.

مقام‌های تاجیکستان در جریان سه سال گذشته بارها از طالبان انتقاد کرده‌اند. رئیس جمهور تاجیکستان گفته طالبان به رغم وعده‌هایی که داده‌اند مخالف تشکیل حکومت فراگیر در افغانستان هستند. امامعلی رحمان در سال ۱۴۰۱ گفت طالبان سیاست تهاجمی تبعیض آمیز علیه اقوام مختلف افغانستان را دنبال می‌کند.

امامعلی رحمان همچنین هشدار داده است که افغانستان، به ویژه ولایات شمالی به محل پرورش تروریسم بین‌المللی تبدیل شده است.

وزیر داخله تاجیکستان نیز گفته بود که طالبان به بیش از سه هزار نفر از «اعضای گروه‌های تروریستی» پاسپورت افغانستان صادر کرده است.

با افزایش فعالیت داعش خراسان در افغانستان، مقام‌های طالبان کشورهای همسایه افغانستان از جمله تاجیکستان را به حمایت از داعش متهم کردند.