وزارت صنعت و تجارت طالبان می‌گوید اوزبیکستان برای سرمایه‌گذاری در بخش‌های انتقال برق و خط آهن در افغانستان اعلام آمادگی کرده است.

طالبان روز چهارشنبه (۱۳ سرطان) گفت که نورالدین عزیزی، وزیر صنعت و تجارت این گروه با عبدالله عارف‌اف، نخست‌وزیر اوزبیکستان دیدار کرده است.

براساس خبرنامه وزارت صنعت طالبان، اوزبیکستان روی انتقال برق سرخان دریا به پلخمری و ادامه انتقال آن به کابل و همچنین در بخش خط آهن حیرتان -هرات - اسپین‌بولدک سرمایه‌گذاری می‌کند.

وزارت صنعت و تجارت طالبان می‌گوید در این دیدار در مورد افزایش حجم تجارت میان دو کشور و جلب سرمایه‌گذاری اوزبیکستان در افغانستان گفت‌و‌گو شده است.

طالبان خبر داد که عبدالله عارف‌اف، نخست‌وزیر اوزبیکستان در آینده نزدیک در راس هیئتی به کابل سفر می‌کند.

وزیر صنعت و تجارت طالبان روز سه‌شنبه در راس یک هیئت تجاری به همراه نمایندگان بخش خصوصی به تاشکند،‌ پایتخت اوزبیکستان رفت.

شبکه توزیع برق در افغانستان عمدتا به نیروی برق وارداتی متکی است و بیشتر نیروی برق وارداتی از اوزبیکستان و تاجیکستان وارد می‌شود.