شهباز شریف به تاجیکستان می‌رود
شهباز شریف، نخست‌وزیر پاکستان، قرار است روز سه‌شنبه، ۱۲ سرطان، در یک سفر رسمی دو روزه به تاجیکستان برود. رسانه‌های تاجیکستان نوشته‌اند این سفر به دعوت امامعلی رحمان، رئیس‌جمهور تاجیکستان انجام می‌شود.
در گزارش رسانه‌های تاجیکستان آمده است که شهباز شریف در دوشنبه با امامعلی رحمان رئیس‌جمهور و دیگر مقامات تاجیکستان دیدار و گفت‌وگو خواهد کرد.
رئیس‌جمهور تاجیکستان روز سه‌شنبه، ۲۹ جوزا، در تماس تلفنی با شهباز شریف، ضمن بررسی سفر وی به دوشنبه، خواهان گسترش روابط میان دو کشور شده بود.
پیش از سفر شهباز شریف به تاجیکستان، روز پنجشنبه، هفتم سرطان، پروازهای مستقیم دوشنبه – اسلام‌آباد آغاز شد. شرکت هوایی «سامان ایر» هفته‌ای یک پرواز به اسلام‌آباد خواهد داشت.
به نظر می‌رسد یکی از اهداف سفر شهباز شریف به دوشنبه، گفت‌وگو درباره اوضاع افغانستان باشد. دو کشور تاجیکستان و پاکستان به شدت از وضعیت افغانستان ابراز نگرانی کرده‌اند.
اخیرا رئیس پارلمان تاجیکستان در نشست سران پارلمان‌های سازمان امنیت جمعی گفت که کشورهای آسیای مرکزی باید روی امنیت مرزی و جلوگیری از نفوذ افراط‌گرایان از خاک افغانستان به گونه فوری کار کنند. او افزود که افغانستان به پناهگاه تروریست‌های بین‌المللی تبدیل شده است.
مقامات پاکستانی هم پیوسته تأکید می‌کنند که خاک افغانستان علیه کشورهای منطقه استفاده می‌شود. نظامیان پاکستانی مدعی هستند که تحریک طالبان پاکستان با استفاده از خاک افغانستان، نظامیان این کشور را هدف قرار می‌دهد. آنان گفته‌اند که حمله به مهندسان چینی نیز از خاک افغانستان سازماندهی می‌شود.
