دوستم از اوزبیکستان و تاجیکستان خواست هلیکوپترهای ارتش پیشین را به نیروهای مقاومت بدهند
عبدالرشید دوستم، رهبر حزب جنبش ملی افغانستان از اوزبیکستان و تاجیکستان خواست که هلیکوپترهای ارتش پیشین افغانستان را به نیروهای مقاومت بدهند. رهبر حزب جنبش ملی افغانستان گفت که این هلیکوپترها باید توسط نیروهای مقاومت در ولایات استفاده شوند.
آقای دوستم این اظهارات را در یک سخنرانی ویدئویی در نشستی در لندن به مناسبت گرامی‌داشت از خیرمحمد خیرخواه، فرمانده کشته شده جبهه مقاومت در اندراب بیان کرد.
به گفته آقای دوستم، دست‌کم ۴۰ هلیکوپر متعلق به ارتش حکومت پیشین، به اوزبیکستان و تاجیکستان منتقل شده‌اند.
پیش از این وزارت دفاع امریکا اعلام کرده بود که تا ۲۱ماه اگست سال ۲۰۲۱، ۴۶ فروند هواپیما در اوزبیکستان و ۱۸ فروند دیگر در تاجیکستان پرواز کرده است.
حکومت اوزبیکستان در ماه ثور سال جاری اعلام کرده بود که هلیکوپرها و هواپیماهای ارتش پیشین افغانستان را به طالبان تحویل نخواهد داد. عصمت‌الله ایرگاشف، نماینده اوزبیکستان برای افغانستان گفته بود این وسایط نظامی «اموال امريکاست» و با موافقت واشنگتن، در اوزبیکستان نگهداری خواهد شد.
آمادگی برای حملات گسترده علیه طالبان در ماه حمل
عبدالرشید دوستم می‌گوید طالبان نظامیان حکومت پیشین را بی‌رحمانه به قتل می‌رساند.
او همچنین با اشاره به کشته شدن نیروهای جبهه مقاومت ملی از سوی طالبان گفت که «خون اندرابی‌ها و پنجشیری‌ها به زمین نخواهد ماند.»
عبدالرشید دوستم تاکید کرد که «طالبان نمی‌ماند» و از نیروهای مخالف این گروه خواست «زودتر بسیج شوند.»
رهبر حزب جنبش ملی افغانستان افزود که باید روی ساختار نظام آینده افغانستان فکر و به گونه قاطع ایستادگی شود.
به گفته او در غیر این صورت، «از کیبل و ترور طالبان خلاص نمی‌شویم.»
عبدالرشید دوستم معتقد است که اعمال خشونت توسط طالبان با به رسمیت شناختن این گروه از سوی کشورها افزایش می‌یابد و رو به اجرای «اعدام‌ها» می‌آورند.
رهبر حزب جنبش ملی افغانستان از نیروهای مقاومت علیه طالبان خواست که برای انجام حملات گسترده علیه طالبان در ماه حمل سال آینده «آمادگی» بگیرند.
یک سال پس از سقوط افغانستان، شماری از مقام‌های جمهوریت و چهره‌های سیاسی در تبعید، از جمله عبدالرشید دوستم، جریان سیاسی را زیر نام «شورای مقاومت برای نجات افغانستان» ایجاد کردند.
