وزیر داخله تاجیکستان: طالبان به "بیش از سه هزار تروریست" پاسپورت افغانستان صادر کرده است
وزیر داخله تاجیکستان در کنفرانس همکاری‌های بین‌المللی و منطقه‌ای برای مبارزه با تروریسم، گفت که طالبان تاکنون به بیش از سه هزار نفر از "اعضای گروه‌های تروریستی" پاسپورت افغانستان صادر کرده است. رمضان رحیم‌زاده افزود: این وضعیت یکبار دیگر خطر رژیم طالبان را تایید می‌کند.
کنفرانس «همکاری بین‌المللی و منطقه‌ای امنیت و مدیریت مرزها برای مقابله با تروریسم و جلوگیری از حرکت تروریست‌ها» روز سه‌شنبه ۲۶ میزان ۱۴۰۱ برای دو روز در دوشنبه، پایتخت تاجیکستان آغاز به کار کرد.
این کنفرانس دو روزه با همکاری سازمان امنیت و همکاری اروپا، تاجیکستان، دفتر مبارزه با تروریسم سازمان ملل، اتحادیه اروپا، عربستان سعودی و قطر برگزار شده است.
وزیر داخله تاجیکستان امروز، چهارشنبه ۲۷ میزان خطاب به شرکت کنندگان تاکید کرد که «مشکلات افغانستان باید در کانون توجه همه باشد.»
امامعلی رحمان، رئیس جمهور تاجیکستان هم در روز اول این نشست گفته بود که ده‌ها هزار "مجاهد و انتحاری" در افغانستان آموزش می‌بینند.
طالبان تاکنون به این اظهارات مقام‌های تاجیکستان واکنش نداشته‌اند. اما این گروه در چند روز اخیر کارزاری را در توییتر به راه انداخته‌اند و با تقدیر و تمجید از نیروهای انتحاری خود در بیست سال گذشته، این اقدام را تبلیغ می‌کنند.
