چین کشته و زخمی شدن شهروندانش در نزدیک مرز تاجیکستان و افغانستان را تایید کرد
وزارت خارجه چین تایید کرد که در حمله مهاجمان مسلح به کارگران چینی در نزدیک مرز تاجیکستان و افغانستان، یک شهروند چین کشته و چهار نفر دیگر زخمی شدند. سفیر چین در دوشنبه از مقام‌های تاجیکستان خواست تا «هرچه سریع‌تر علت این حادثه را روشن کنند.»
منابع محلی روز دوشنبه، ۲۸ عقرب به رسانه‌ها گفتند این حادثه در دره زربوز ناحیه شمس‌الدین شهین در ولایت ختلان تاجیکستان رخ داده است.
وزارت خارجه چین روز گذشته در بیانیه‌ای که به خبرگزاری فرانسه ارسال کرده، گفت: «در ۱۸ نوامبر، مرکز یک شرکت خصوصی چینی در منطقه مرزی تاجیکستان و افغانستان مورد حمله قرار گرفت که منجر به کشته شدن یک شهروند چینی و زخمی شدن چهار نفر دیگر شد.»
این بیانیه افزود: «چین به شدت این حمله خشونت‌آمیز را محکوم می‌کند و از مرگ شهروند خود و زخمی شدن چهار تن دیگر عمیقاً ابراز تاسف می‌کند.»
وزارت خارجه چین همچنین اعلام کرد که «یک گروه کاری» از سوی سفارت این کشور در دوشنبه به منطقه اعزام شده است تا «با مجروحان ابراز همدردی کرده و هماهنگی‌های لازم برای رسیدگی به امور بعدی را انجام دهد.»
در این بیانیه به انگیزه و هویت مهاجم یا مهاجمان اشاره‌ای نشده است.
وزارت خارجه چین تاکید کرد: «با توجه به وضعیت امنیتی در منطقه مرزی تاجیکستان و افغانستان، به شهروندان و شرکت‌های چینی در این منطقه یادآوری می‌کنیم که به امنیت خود توجه ویژه داشته باشند.»
شرکت‌های چینی، به‌ویژه آن‌هایی که در زمینه استخراج مواد معدنی خام مانند طلا فعالیت دارند، حضور گسترده‌ای در کشورهای آسیای میانه از جمله تاجیکستان دارند.
تاجیکستان دارای مرزی به طول ۱۳۵۰ کیلومتر با افغانستان است و روابط این کشور با رژیم طالبان پرتنش است.
تاجیکستان تنها کشور منطقه است که هیچ‌گونه روابط دیپلوماتیک با طالبان ندارد و بارها از تهدیدهای ناشی از افراط‌گرایی و تروریسم از خاک افغانستان ابراز نگرانی کرده است.
مقامات تاجیکستان از سازمان امنیت جمعی و سازمان همکاری شانگهای خواسته‌اند که در زمینه تقویت مرزها و ایجاد کمربند امنیتی در مرز افغانستان با این کشور همکاری کنند.
