نمایندگان اوزبیکستان و اتحادیه اروپا درباره وضعیت افغانستان گفت‌وگو کردند
عصمت‌الله ایرگاشف، نماینده اوزبیکستان در امور افغانستان و تری هاکالا، نماینده اتحادیه اروپا برای آسیای میانه درباره وضعیت افغانستان تبادل نظر کردند. در این دیدار بر همکاری مشترک اوزبیکستان و اروپا و جلوگیری از بحران بشری در افغانستان تاکید شد.
وزارت خارجه اوزبیکستان روز جمعه ۱۱ عقرب در خبرنامه‌ای نوشت که آن‌ها چشم انداز آینده همکاری اوزبیکستان و اروپا درباره مسائل افغانستان را بررسی کردند.
جزئیات این گفت‌وگو اعلام نشده، اما در خبرنامه آمده است که به امکان استفاده از مرکز حمل و نقل و لجستیک بین‌المللی شهر ترمذ، برای ارسال کمک‌های بشردوستانه به افغانستان توجه ویژه‌ای شد.
طبق این خبرنامه، تری هاکالا از اقدامات اوزبیکستان با هدف ایجاد یک موضع واحد در مورد افغانستان هم قدردانی کرده است.
اوزبیکستان هرچند همانند دیگر کشورها طالبان را به رسمیت نمی‌شناسد، اما ارتباط گسترده اقتصادی و دیپلوماتیک با طالبان دارد.
عصمت‌الله ایرگاشف در ماه‌های گذشته بارها در دیدار با مقام‌های مختلف اروپا، درباره افغانستان گفت‌وگو کرده است.
