نتانیاهو د ایران خلکو ته: ایران به له هغه ژر ازاد شي چې تاسې یې فکر کوی

د اسراییلو لومړی وزیر بنیامین نتنیاهو د ایران خلکو ته په یو ویډیویي پیغام کې ټینګار وکړ، چې ایران کې به اسلامی جمهوریت له هغه ژر نسکور شي چې خلک فکر کوي.

دا له یوې میاشتې څخه په کمه موده کې دوهم ځل دی چې نتنیاهو د ایران خلکو ته پیغام خپروي.

نوموړي د نومبر په ۲۲مه په یو پیغام کې ویلي وو، چې اسلامي جمهوریت به ډېر ژر ړنګ شي.

د اسراییلو لومړي وزیر په خپل نوي پیغام کې یو ځل بیا ټینګار وکړ چې په دغه هیواد کې اسلامي جمهوریت به له هغه ژر نسکور شي چې فکر یې کیږي. هغه وايي: ښځه، ژوند، ازادي. دا د ایران راتلونکی دی. دا د سولې راتلونکی دی.»

نتانیاهو په سوریه کې د بشار الاسد د ملاتړ لپاره د اسلامي جمهوریت له خوا له ۳۰ میلیارد ډالرو څخه زیاتو لګښتونو ته په اشارې سره زیاته کړه: له ۱۱ ورځو جګړې وروسته د هغه [د اسد] رژیم نسکور شو.

نتانیاهو یادونه وکړه چې "ستاسو ظالمانو" په غزه کې د حماس د ملاتړ لپاره میلیاردونه ډالر ولګول، خو نن حماس له منځه تللی دی.

د اسراییلو لومړي وزیر وویل، چې د ایران حکومت په لبنان کې د حزب الله د ملاتړ لپاره تر ۲۰ میلیارده ډالرو زیاتې پیسې لګولي، خو یوازې په څو اونیو کې د اسراییلو په بریدونو کې د دې ډلې یو زیات شمېر مشران او ځواکونه ووژل شول.

د حزب الله عمومي منشي نعیم قاسم د ډسمبر په پنځلسمه ویلي و، چې اسلامي جمهوریت به د لبنان هرې کورنۍ ته له ۱۲۰۰۰ څخه تر ۱۴۰۰۰ ډالرو پورې مرستې ورکړي.