د ملا هبت الله حکم: د «بشري سرچینو ریاست» پر ځای د کارکوونکو د چارو ریاست کلمه وکاروئ

د طالبانو مشر ملاهبت الله په خپله یو تازه حکم کې د خپلې ډلې حکومت ته ویلي، چې ادارو کې د بشري سرچینو ریاست پرځای د کارکوونکو د چارو ریاست کلمه وکاروي.

د طالبانو د مشر په حکم کې ویل شوي باید له دې وروسته د یاد ریاست اړوند ټول مراسلات »د کارکوونکو د چارو ریاست» په نوم ولیکل شي.

د طالبانو تر واک لاندې باختر دولتي اژانس نن شنبه «د لیندۍ ۳مه» لیکلي چې دغه خکم د ۳۰/۴/۱۴۴۶ نېټې د (۲۶۸/۲۱۵) ګڼه حکم کې لیکل شوي.

په دغه حکم کې راغلي:« چې په اینده کې دې د بشري سرچینو ریاستونه، مدیریتونه او امریتونه د کارکوونکو د چارو ریاست، مدیریت او امریت په نامه یادېږي.»

واک ته رسېدو سره طالبانو د اطلاعاتو او فرهنګ وزارت په چوکاټ کې د نوم اېښودنې کمېسیون جوړ کړ.
نوم اېښودنې کمېسیون ویلي و، د ټولو هغو سړکونو نومونه چې د قومي او شخصي سلیقو له مخې اېښودل شوي، په تاریخي او یا به په خپلو تېرو پخوانیو نومونو واړول شي.
طالبانو د خپلې واکمنۍ له پیله تر اوسه د ډېرو عامه سیمو نومونه بدل کړي دي.

د طالبانو د اطلاعاتو او کلتور وزارت له هټیو، هستوګنځیو، سوداګریزو مرکزونو، بنسټونو او موسسو غوښتي ول، چې په خپلو نښو،لیکدړو او لوحو باندې د "ناقانونه انځورونو" لګولو او د بهرنیو ژبو له لیکولو ډډه وکړي.

دغه وزارت ویلي، چې دغه لوحې باید په ملي او محلي ژبو ولیکل شي.

خو د دوی نوي نومونه په تېره تخنیکي برخه کې د مروجو هغو بدیل یا ورته مناسب نه بلل کېږي.