طالبان وایي، په بېلابېلو ولایتونو کې یې ۱۱ کوډګر نیولي دي
د طالبانو د امر بالمعروف او نهې عن المنکر وزارت وایي، چې د تېرې یوې اونۍ په اوږدو کې یې په بېلابېلو ولایتونو کې ۱۱ تنه کوډګر نیولي دي.
د دغه وزارت لهخوا په یوې خپره شوې خبرپاڼه کې راغلي، چې دغه شمېر کوډګر یې په غزني، دایکنډي، بلخ او هلمند ولایتونو کې نیولي دي.
د طالبانو د امر بالمعروف او نهې عن المنکر وزارت تر دې وړاندې هم د کابل او غزني په ګډون په بېلابېلو ولایتونو کې ځیني کوډګر نیولي وو.
په افغانستان کې د کوډګرو د نیونې لړۍ له هغه وروسته پیل شوه، چې د طالبانو د امر بالمعروف او نهې عن المنکر وزارت اعلان وکړ چې په ټول افغانستان کې یې د تعویذ لیکنې او کوډګرۍ پر کاروبار بندیز لګولی دی.
د دغه وزارت ویاند محمد صادق عاکف ویلي و: «په شریعت کې د کوډګرو او ساحرانو وژلو ته جواز ورکړل شوی دی.»
که څه هم چې یو شمېر خلک د طالبانو لهخوا د کوډګرو د نیولو ستاینه کوي؛ خو دغې ډلې تر ډېره د خلکو پر ځینو نورو مذهبي او کلتوري دودونو هم بندیزونه لګولي، چې ځیني خلک ترینه ناراضه دي.
دا رنګه په ودونو کې په ټنګ ټکور لګېدلي بندیزونه او یا پر دودیزو مېلو وضع شوي محدودیتونه هغه څه دي، چې پر دغې ډلې یې د خلکو نېوکې زیاتې کړې دي.
