د ملګرو ملتونو ځانګړې کمېټه وايي، په غزه کې د اسراییل جګړه «نسل وژنه» ده
د ملګرو ملتونو یوې ځانګړې کمیټې ویلي، چې د غزې په جګړه کې د اسراییل لهخوا د لوږې څخه د وسلې په توګه کار اخیستل، د عامو خلکو مرګ ژوبله او په قصدي ډول د فلسطین په خاوره د وژونکو شرایطو وضعه کول د «نسل وژنې» په معنا دي.
د اسراییل د کړنو د څېړلو لپاره د ملګرو ملتونو ځانګړې کمیټې ویلي، چې د جګړې له پیل راهیسې اسراییلي چارواکو په عامه توګه د هغو پالیسیو ملاتړ کړی چې فلسطینیان یې له لومړنیو اړتیاوو لکه خوراکي توکو، اوبو او تېلو څخه بې برخې کړي دي.
ځانګړې کمیټې زیاته کړه، چې د اسراییلي چارواکو څرګندونې او غزې ته د بشري مرستو د رسولو بندول په ښکاره توګه د اسراییل اراده څرګندوي، چې د سیاسي او پوځي ګټو لپاره د وسیلې په توګه له دغو کړنو کار اخلي.
د ملګرو ملتونو عمومي اسمبلۍ په ۱۹۶۸ کال کې د ګولان په لوړو، لوېدیځه غاړه، د غزې تړانګې او بیت المقدس کې د بشري حقونو د څارنې لپاره کمیټه جوړه کړې وه.
په راپور کې ویل شوي، چې د ۲۰۲۴کال له پیله په غزه کې له ۲۵زرو ټنو څخه ډېر چاودېدونکي توکي کارول شوي.
کمیټې زیاته کړې، دا په بشپړ ډول له غړو هېوادونو سره تړاو لري چې د نړۍوال قانون اطاعت او د سرغړونو لپاره حساب ورکونه یقیني کړي.
دغه کمېټه به په رسمي توګه د ملګرو ملتونو د عمومي اسمبلۍ ۷۹مې غونډې ته خپل راپور وړاندې کړي.
