د جرمني لومړی وزیر نن پارلماني کمېټه کې د «افغان تخلیې» په اړه پوښتل کیږي
داسې مهال چې د جرمني لومړی وزیر اولاف شولڅ واردمخه د باور رایو او تر وخت مخکې ټاکنو په خبرو کې بوخت دی، نن د پنجشنبې په ورځ به د بوندستاګ یا پارلمان "د افغانستان د څیړنو کمیټه" کې د شاهد په توګه وپوښتل شي.
شولڅ به په دې ناسته کې د ۲۰۲۱ کال په اګست کې د طالبانو د راتګ پرمهال وضعیت په تړاو پوښتل کیږي چې ولې جرمنيانو په خپل وخت د افغان وګړو او د جرمني ځايي کارکوونکو د ايستلو لړۍ پیل نه کړه.
شولڅ دغه مهال د وخت د لومړۍ وزیرې انګیلا مېرکل په کابینه کې مرستیال او د مالیې فدرال وزیر و.
دغه کمېټه له افغانستان نه د جرمني د محلي افغان همکارانو د تخلیې په بهیر کې له پخوانیو چارواکو او هغو کسانو ګروېږنې کوي چې په دغه بهیر کې ښکیل وو.
د زرغون ګوند رییسې سارا ناني ډایچلنډ فونک ته وویل چې نوموړې به وپوښتي چې « ایا اولاف شولڅ له افغانستان سره لېوالتیا درلوده؟ او که لري یې نو ولې دوی په کمه کچه لیدلې».
په دې ناسته کې پخوانۍ دفاع وزیره هم پوښتل کیږي. د کمیټې غړي وايي، چې مېرمن کارن باویر په هغه وخت کې لومړۍ وزیرې ته نږدې وه او پوهېده چې په افغانستان کې څه تېریږي.
د کمیټې د غړو په باور، په همدې لامل نوموړې باید وپوښتل شي چې ولې یې په کابینه کې دې مسالې ته رسیده ګي ونه شوای کړای.
ټاکل شوې ددغه هېواد مخکینۍ لومړۍ وزیره انګیلا مېرکل د ډسمبر میاشتې پر پنځمه دې کمېټې ته وبلل شي.
دغه کمېټه به د خپلو څېړنو په لړ کې له افغانستان نه د جرمني ځواکونو د وتلو شرایط روښانه کړي.
د واکمن ګوند سیاستوال رالف سټیګنر، چې د څیړنو کمیټې مشري کوي، د چارشنبې په ورځ ډاډ ورکړ چې کار به زر او په بریالیتوب سره بشپړ شي. هغه وویل، چې اوس له وخت مخکې ټاکنو ته اړتیا ده چې دا پروسه نوره هم چټکه شي.
