ناڅرګندو وسله والو د خیبر پښتونخوا په باجوړ کې د جماعت اسلامي ګوند سیمه ییز مشر وژلی

د پنجشنبې په ورځ وسله والو کسانو د خیبر پښتونخوا د باجوړ ولسوالۍ اړوند عنایت کلا بازار ته نږدې د جماعت اسلامي ګوند یو محلي مسوول حمید صوفي وژلی دی.

د باجوړ پولیس وايي، چې نوموړي له برید وروسته سملاسي سا ور کړې ده.

نوموړی د ماښام له لمانځه وروسته کور ته د تګ پرمهال موټرسایکل سپرو وسله والو وژلی.

د جماعت اسلامي ګوند مخکیني سناتور او سیاستوال مشتاق احمدخان ددې پېښې په غبرګون کې د پاکستان پر امنیتي ځواکونو او څارګرو ادارو نیوکه کړې چې ددوی په شته والي کې ترهګرې ډلې عملیات کوي.

نوموړي له ایالتي حکومت نه د وژونکو د زر نیولو غوښتنه کړې ده.