اسراییل په غزه کې د بشریت ضد جنایتونو په اړه د بشري حقونو د څار سازمان رپوټ ردوي
اسراییل وايي، چې د غزې په تړانګه کې د دوی له خوا د خلکو د جبري بې ځایه کولو او د "بشریت ضد جرمونو" د ترسره کولو په تړاو د بشري حقونو د څار سازمان رپوټ واقعیت نه لري.
په دې اړه د اسراییلو د بهرنیو چارو د وزارت ویاند اورن مارمورشتاین پر اېکس ټولنیزې رسنۍ لیکلي: «په غزه کې د اسراییلو د چلند په اړه د بشري حقونو د څار ادارې څرګندونې په بشپړه توګه دروغ او له واقعیته لرې دي».
هغه زیاته کړه، چې د دغه سازمان د ادعاوو پر خلاف، د اسراییلو کوشش یوازې د حماس د ترهګریزو وړتیاوو له منځه وړل و، او د غزې خلک یې نه دي په نښه کړي.
مارمورشتاین، حماس تورن کړ چې له ملکي وګړو د انساني سپر په توګه کار اخلي او ټینګار یې وکړ: “اسراییل به د جګړې له قوانینو سره سم خپلو عملیاتو ته دوام ورکړي.”
دا په داسې حال کې ده، چې په خواله رسنیو کې په وار وار خپرې شوې ویډیوګانې ښيي، چې اسراییلو په قصدي ډول ملکي خلک په نښه کړي، ماشومان یې وژلي او په روغتونونو یې بریدونه کړي. د ملګرو ملتونو د یو وروستي راپور له مخې، په غزه کې د اسراییل په بمباریو کې د وژل شوو کسانو ۷۰ سلنه ښځې او ماشومان دي.
