امریکا په پولنډ کې د هوايي دفاع نوې اډه پرانېسته

متحده ایالتونو د چارشنبې په ورځ په پولنډ کې د هوايي دفاع یوه نوې اډه پرانېسته، خو مسکو وايي، چې دا چاره د روسیې د پوځي وړتیاوو د مهارولو لپاره ترسره کیږي او وړ ځواب به ور کړي.

دغه اډه بالتیک سمندرغاړو ته څېرمه په ردزیکوور ښار کې پرانېستل شوې ده.

د رویټرز د رپوټ له مخې، په داسې وخت کې چې د ډونالډ ټرمپ له بري وروسته د ناټو په غړو کې اندېښنې را ټوکېدلې، وارسا وايي، پر دې اډې د کار دوام ښيي چې واشنګټن کې هرڅوک واک ته رسیږي د پولنډ او امریکا اړیکې به پرځای وي.

د پولنډ ولسمشر اندري دودا وايي چې واشنګټن د پولنډ د امنیت ضامن دی او په دې اډه کې د امریکايي ځواکونو دایمي حضور وښوده چې دغه هېواد د روسیې تر نفوذ لاندې نه دی.

کرملین د چارشنبې په ورځ دغه اډه د روسیې د پوځي وړتیاوو د کنټرول کولو هڅه وګڼله.

د پولنډ د ملي امنیت دفتر رییس یاچک سیویرا ددوشنبې په ورځ ویلي و چې د نومبر پر ۱۳مه به په ردزیکوو ښار کې د امریکا د هوايي او توغندويي دفاع یوه اډه پرانېستل شي.