محمد خالد حنفي: «شریعت پلی کوو» او په دې برخه د هیچا فشار نه منو
د طالبانو د امربالمعروف او شکایتونو اوریدو وزیر کندوز کې یوې غونډې ته د وینا پر مهال ویلي، چې د «شریعت پلي» کولو په برخه کې د هیچا فشار نه مني. محمد خالد حنفي، دا نه دي ویلي چې په دې برخه کې د چا له فشار لاندې دي.
د طالبانو تر واک لاندې ملي ټلویزیون نن دوشنبه د (زمري ۲۹مه) په ایکس پاڼه لیکلي چې د دغې ډلې د امربالمعروف او شکایتونو اوریدو وزیر محمد خالد حنفي کندوز ولايت ته تللی او هلته یې له ديني عالمانو او قومي مخورو سره په غونډه کې ويلي، چې دغې ډلې «جهاد د اسلامي شریعت د پلي کیدا لپاره کړی او په دې برخه کې د بل چا فشار ته غاړه نه ږدي.»
ملي ټلویزیون د حنفي له قوله ویلي، چې د طالبانو حکومت ټول چارواکي یې اړویستي چې د خپل مشر هر ډول فرمانونه ومني او پلي یې کړي.
خو حنفي په خپلو خبرو کې دا نه ویلي، چې د اسلامي شریعت د پلي کولو په برخه کې چا او یا کوم هیواد پر فشار راوړی.
تېره ورځ د طالبانو د دفاع وزیر ملا محمد یعقوب هم د افغانستان د خپلواکۍ د بېرته ګټلو د ۱۰۵مې کلیزې نماځغونډه کې پرته له دې چې د کوم هېواد نوم یاد کړي وویل، چې په «افغانستان کې نه چا فرمایش منو او نه هم د چا په فرمایش حکومت جوړول منو.»
واک ته د طالبانو تر رسیدو وروسته درې کاله کیږي، چې نړۍواله ټولنه او د سیمې هیوادونه له طالبانو غواړي چې په افغانستان کې دې ټولګډونه حکومت جوړ کړي او د وګړو ټول بشري حقونه دې په پام کې ونیسي، خو طالبان وايي، دوی د خپلې خوښې حکومت کوي او د نورو دا ډول څرګندونې په خپلو چارو کې لاسوهنه بولي.
طالبان هر وخت په ځانګړي ډول د کوم هیواد نوم نه اخلي او په خبرو کې یوازې په اشارو سره هغو هیوادونو او سازمانونو ته پیغام رسوي چې دوی ېې غوښتنې نه مني.
