سپنتا: په افغانستان کې د عادلانه نظام د جوړېدو یوازینۍ لار د مبارزې زیاتول او اتحاد دی
د افغانستان د بهرنیو چارو پخوانی وزیر رنګین دادفر سپنتا وایي، چې په افغانستان کې د عادلانه نظام د جوړېدو یوازینۍ لار د مبارزې زیاتول او اتحاد دی.
نوموړي په خپل اېکس کې پر افغانستان د طالبانو درې کلنې واکمنۍ ته په اشارې سره لیکلي: «یوازې د مبارزې په شدت سره د ازادۍ، قانون او ورورولۍ پر بنسټ یو عادلانه نظام جوړېدلی شي، بله لار نه شته.»
رنګین دادفر سپنتا همداراز زیاته کړې، چې افغانستان له درېیو کلونو راهیسې له بشري تمدني حالت څخه په ډېرې چټکۍ سره وتلی دی.
ښاغلی سپنتا په داسې حال کې د طالبانو پر وړاندې د مبارزې د شدت خبره کوي، چې یادې ډلې له درېیو کلونو راهیسې د ښځو او بشري حقونو، د بیان د ازادۍ، د نجونو د تعلیم او لسګونه نورو مواردو په اړه هېڅ کوم نرمښت نه دی ښودلی.
د ۲۰۲۱ کال د اګسټ په ۱۵مه چې د هېواد پخوانی ولسمشر اشرف غني له افغانستانه ووت، طالبانو له شل کلنې جګړې وروسته بیا د کابل په ګډون ټول ولایتونه ونیول.
که څه هم ډېری افغانان دا ورځ د تورې ورځې په نامه یادوي، خو طالبان یې د بریا ورځ بولي او په شاندارو مراسمو سره یې نمانځي.
د افغانستان له پرځېدو سره امنیتي ادارې له منځه ولاړې، د ښځو په ګډون زرګونه کسان بې روزګاره شول، میلیونونه کسان د سیمې د هېوادونو په ګډون اروپایي او امریکایي هېوادونو ته کډوال شول او د تېرو شلو کلونو لویې لاسته راوړنې له خاورو سره خاورې شوې.
